هم بالچما طائفية!

حتى بالچما طائفية!

شتات الحديث…

-هذا الچما بالسوگ كله من ايران.
-ايران وين بيها چما؟
-لا اكو. بس چيف منطقة نفق الشرطة كلهم سنة، يخافون يگلون هذا ايراني، فيدعون جايبي من هيت.

***

-الله يساعدهم، هذا هيتاوي؟
-لا، عانة.
(بگلبي گلت لعد شوفني وصل الگمارك من دولة الخلافة…)

***

-ايام گبل، چانو يگلون، الزهرا اتوحّمت وهي حامل بالحسن، ورادت لحم بليا عظم، وانخلق الچما…
(بعدين فتنا بإيراد ومصرف على قصة فرحة الزهرا، وإلها علاقة بإغتيال عمر بن الخطاب لو لا، بس همزين هل ايام العراقيين عندهم گوگل و 3G، وطلعت فرحة الزهرا يوم 9 ربيع الاول، وعمر اغتالوا يوم 26 ذي الحجة…)

***

هسة عوفوكم من سالفة هذا الچما طلع ببركات الولي الفقيه لو الخليفة، عندي مشكلة كبرى، البارحة تعنيت وغسلته، وفركته بفرچة اسنان، وگشرته، وغليته، بس طلع بليا طعم، وهذا يوجع الگلب، لأنه كل كيلو بذاك الحساب. منو بيكم عنده اسرار فك شفرة الچما؟ بيها سحر لو تعويذة؟ إشگد لازم يبقى على النار؟ وعموما، إنتو شلون تآكلوا؟

شتفيدكم الطائفية اذا الچما صار بليّا نكهة؟

چماي ماني چماي، درب الچما اندليتو
…كل العمر داريتو

    1.
  1. May 23rd, 2016 at 8:11 am
      يقول:

    كشر الجما بالكشاره مو بالسكين ثم يقطع ويغمر بالماي ثم يرفع من الماي وتعاد العمليه ثم يسلق في قدر لعده دقايق ويصفي بالمصفي ثم يستعمل اما نضيفه عله بصل مقلي ونستمر بالتقليب مع البصل واضافه الملح والكركم والنومي البصره المطحونه وتناوله مع الخبز ويمكن اضافه البطاطه المقطعه الي البصل قبل اضافه الجمه ويمكن وضع كل هذي الطبخه داخل التمن الابض بعد تصفيته يرجع للقدر طبقات مع خلطه الجمه و البصل ويهدر الكل عله نار خفيفه وبالعافيه

تعليق