المالكي يعلن إحالة ملف عن الفساد في البنك التجاري على القضاء

الرابط: المالكي يعلن إحالة ملف عن الفساد في البنك التجاري على القضاء

تعليق الموقع: چنت گاعد ودا اترقب، دا ريد اشوف شنو هي الخطوة الاستعراضية اللي رح يسويها المالكي حتى يتيه سالفة الميت اليوم اللي رح تخلص بعد ايام. بس ابد ما چنت اتخيل ان هذه الخطوة رح تكون انه رح يچفت بنك تجارة العراق ويصدر امر القاء قبض على مدير البنك، حسين الازري.
بنك تجارة العراق وحيد مؤسسة مصرفية ومالية ناجحة في العراق، وتحظى بتقدير بيوت المال الكبرى في العالم، وهذي المصالح المالية ما تثق بكلمة دولة العراق في ما يخص التزاماتها المالية، بس تثق ببنك الـ”تي بي آي” وحسين الازري. وها حچاية سامعها من اكثر من مستثمر امريكي كبير: “العراق بي هواية مشاكل، بس احنة نثق بمهنية حسين الازري وفهمة للعالم المصرفي الحديث، وعلى الاقل نعرف اكو مؤسسة بالعراق تشتغل صح.”
اليوم المالكي طلع عضلاته بس ما استعمل عقله. اليوم، يا جماعة، انزرف جيب العراق.
اللي صار هو نكبة لسمعة العراق المالية. الحجة ان البنك ناطي قروض من دون ضمانات. هذا موضوع صارلها النزاهة دا تدور عليه من سنة. ووياهم البنك المركزي. الى درجة ان ديوان الرئاسة المالية فتح مكتب بنص البنك لمراقبة النشاط. موقف البنك، وموقف حسين الازري، كان محاولة لإقناع هؤلاء ان الامور اللي ما گاعدين يفتهموها هي الادارة الحديثة للبنوك في العالم، اللي تتبع مواثيق “باسل ون” وباسل توو” (باسل مدينة بسويسرا)، بس الجماعة، من ورا اشتراكية البعث وانقطاع العراق عن العالم لسنين طويلة، چانت صعبة عليهم هذه المفاهيم.
واذا جماعة النزاهة والمركزي والرقابة المالية ما جايين يفهمون، فشلون الحال بالمالكي وربعة؟ اذا اقوى واحد بالاقتصاد يم المالكي فهمه للإقتصاد العالمي هو فهم البگال؟ عبالهم الشغلة سعر الخيار بالعلوة، وتذبذبات بورصة معجون الطماطة.
نعم، حال العراق في الشؤون الاقتصادية والمالية تعيس ومتخلف عن العالم، بس بنك تجارة العراق بإدارة الازري، وهو سليل عائلة بغدادية عريقة شغلتها هي المصارف من الثلاثينات، چان علامة مضيئة في البلد، ورمز من رموز عودة العافية. بنك مهني يبيض وجه العراق امام العالم، ولأنه مهني وموثوق صارت اغلب عقود الدولة مع الخارج تدار من هذا البنك، اللي هو قطاع مختلط بين الدولة والقطاع الخاص.
آني ما عندي مصلحة ويا البنك لا من بعيد ولا من قريب. آني مجرد عراقي يفتخر ان البلد بي مؤسسة محترمة عالميا. وآني من المعجبين بحسين الازري واسلوبه الهادي في التوسع والتطور، واستقطابه لعراقيي وكفاءات الخارج حتى يوظفهم ويربطهم من جديد بالعراق الجديد. وچان عنده مشروع لتوسع البنك في كل المحافظات وفي البلدان المجاورة وفي لندن، والبنك قائم على علاقاته المصرفية العالمية وهو رجال اشتغل في كل ارجاء العالم من كلاثين سنة.
بس الفهيم المالكي اصدر عليه امر القاء قبض ودز اربعين همر لإقتحام البنك بعد ان اجتمع مع حسين ومدراء البنك. المالكي اتهمهم بالفساد والمحسوبية (…شوفو منو دا يحچي، والريحة عاطّة من مكتب الحجي ابو اسراء والمحيطين بي، من ابنه ورجل بنته وشيل ايدك) ولمن حسين جاوبه بالمعلومات وبتحريات النزاهة والرقابة المالية، عاط بي المالكي وبدا يصرخ بعلو صوته “فساد، فاسدين”. هذا حال رئيس وزراء، جاي يتفيّك؟ ورة ما طلع المالكي، جتي اربعين همر من خيالة الحجي، اقتحموا البنك بحركات صبيانية، ووياهم امر القاء القبض على حسين الازري.
يا جماعة، المالكي مو گدها. جاي دا يلعب سياسة بمقدرات البلد وسمعة البلد. هذي الخطوة اللي صارت اليوم نكسة كبيرة مو من السهولة ان يتعافى العراق منها. يا بة ليش سوو هيچ؟ اكو من يگول جماعة الدعوة الاخطبوطية جايين يكووشون على البنك. ناس ثانيين يگلون هاي موجهه ضد احمد چلبي چيف حسين الازري يصير حفيد اخت الچلبي. بس بالنسبة الي، الشغلة واضحة، استعراض سياسي حتى المالكي يگول “شوفو، دا احارب الفساد.” ابو اسراء، تريد تحارب الفساد، ليش ما تبدي بعصام الاسدي وتفتح عليه تحقيق؟ لو الشغلة ما تصرفلك؟
جد المالكي، يعني ابو ابو، ابو المحاسن الجناجي (…هذا لقبهم)، جان رجال حوزوي روزخونچي، صاحب لسان ومنبر، يعني بالحچي لبلبان. عينوا وزير معارف في سنة 1934، بس ورة چم شهر، طلعوا من الوظيفة. هو اشگال؟ “آني استنكف اشتغل وية الانكليز”. بس الوثائق شت تگول؟ الرجال كان غير كفوء وما يفتهم الچك من البك في الادارة. ذاك يوم وهذا يوم. آني وصلت الى قناعة ان المالكي وحاشيته وحزبة صاروا گشر موز إبدرب العراق العاثر ولازم ينشالون شيل من الياخة. رحم الله امرىء عرف قدر نفسه.

    1.
  1. June 7th, 2011 at 10:15 am
    موظف في المصرف
      يقول:

    الف رحمة على والديك كل الي كلتة صح حسين الازري نزيه ويبقة نزيه واحس مدير . جابولنة وحدة بمكانة اسمهة حمدية الجاف (حمدية الدلالة) جانت مديرة مصرف الزوية وكلكم تعرفون حادثة السرقة المشهورة هي جانت مديرة المصرف والعاقل يفتهم.
    في الختام السلام………..

  2. 2.
  3. June 17th, 2011 at 4:59 pm
    رافل
      يقول:

    لا ينفع الناس فوضى لا سراة لهم ولا سراة اذا جهالهم سادوا

تعليق